Ekainaren 26tik 30era bitartean, festa giroan murgilduta izango dira oriotarrak. Izan ere, herriko jai kutunak ospatuko dituzte hilaren amaieran, eta horretarako, egitarau biribila osatu du udalak, herriko eragileekin batera: sardin jana, herri bazkaria, kontzertuak eta erromeriak, kirol jarduerak eta saregileei eta arrantzaleei zuzendutako omenaldia egingo dituzte. Aurtengo festetan, gainera, aspaldiko partez danborradak hartuko ditu herriko kaleak.