Sanpedroetan hirugarrenez egingo dute aurten kronoigoera. Ekainaren 28an, igandearekin, izango da bizikleta igoera Herriko Plazatik alde zaharrerantz, 11:00etan, Aldapa zikloturista elkarteak antolatuta. Izena ostiraletik aurrera eman ahalko da herriko bi ikastetxeetan, kiroldegian nahiz Kolon Txiki tabernan, eta antolatzaileek herritarrak parte hartzera animatu dituzte, "urteko aukera bakarra baita Herriko Plazan eta Goiko Kalean bizikletan ibiltzeko, gune horiek oinezkoentzat direlako". Gainera, partaideen artean sari bereziak zozkatuko dituztela azaldu dute.
Aurreko edizioetan bezala, aurten ere proba Herriko Plazatik abiatuko da, eta bi kategoria izango ditu: 8 eta 14 urte arteko haurrek Pillikura egingo dute igoera; 14 urtetik gorakoak, berriz, San Martin ermitara igoko dira.