Urruneko kontua dirudi emakumeen mutilazio genitalarenak, baina munduan 30 herrialdetan praktikatzen dute oraindik –esaterako, Senegalgo zenbait eremutan–, eta Urola Kostan bertan hiru kasu atzeman zituzten 2024an; zehazki, Orion. Emakumeen Mutilazio Genitalaren Aurkako Nazioarteko Egunaren bezperan, Orion eta Iruñean bizi diren Senegalgo emakume banak beren esperientzia kontatu dute, bai emakume gisa, bai profesional gisa. Bat emagina izan zen Senegalen, eta besteak emakumeen genitalen mutilazioa prebenitzeko lan egiten du Nafarroako Munduko Medikuak erakundean. Onintza Lete Arrietak otsaileko Guka taldeko aldizkarietarako idatzitako erreportajea da honakoa.