Aurreko astean bezala, oraingoan ere alironarekin amaitu dute asteburua Orioko arraunlariek. Larunbatean zorte txarra izan bazuten ere Castron, Orio Arraunketa Elkarteko gizonezkoek etxeko bandera astindu ahal izan zuten atzoko jardunaldian. Hain justu, Orioko itsasoan jokatu zen Eusko Label ligako Orio Kanpina XIV. Bandera irabazi zuten Iker Zabalaren mutilek.
Ohiturekin jarraituz, herritar mordoa atera zen atzo iluntzean kalera, elastiko horiak soinean, txapeldunak zoriontzera. Orioko Txarangaren doinuak ere ez ziren falta izan, eta beste behin, herri oso baten besarkada jaso zuten etxeko txapeldunek.
