Asteburuko bigarren bandera ere Oriok eskuratu du gaur Galiziako uretan, eta bandera ez ezik, Eusko Label liga ere matematikoki irabazi egin du San Nikolas ontziak. Iker Zabala entrenatzaileak zortzi aldaketa egin ditu traineruan atzotik gaurrera, taldeko 21 kideek egin dute arraun bi egunetan, eta ez dute hutsik egin ez batzuek, ez besteek.
Gaurkoan ez dira estropadaren buru jarri hasieratik, baina behin gainerakoei aurre hartu dietenean, ez dute atzera egin, eta bukaerara arte segundo dezenteko tartearekin ibili da Orio. Borroka gehien bigarren txandako Donostiarrarekin izan dute, une batzuetan soilik bi segundoko aldea egon baita bi taldeen artean. Zierbena, Getaria eta Bermeorekiko, berriz, 8-10 segundoko aldearekin ibili da Gorka Aranberriren taldea ia bukaerara arte. Azken metroetan, hori bai, Zierbena gerturatu egin da, eta lau segundora helmugaratu da azkenean. Hirugarren tokia Donostiarrarentzat izan da, laugarrena Getariarentzat, eta Bermeok bosgarren tokiarekin konformatu behar izan du gaurkoan.
Galiziatik Oriora iritsi bezain pronto, ohiko harrera egingo diete arraunlariei zaleek eta Orioko Txarangak, 21:00etan.
Liga ez da amaitu, iraileko hirugarren asteburuan jokatuko dituzte azken bi estropadak Bizkaian, baina aurrez, datorren astean hasita, urteko hitzordu garrantzitsuena izango dute traineruek: Kontxako Bandera. Asteazkenean gizonezkoen sailkapen estropada izango da 18:00etan, eta ostegunean, ordu berean, emakumezkoena.
