Hiru bandera eskuetan dituztela itzuli dira asteburuan etxera Orioko gizonezkoen bi talde nagusiak, eta herritarrek harrera paregabea egin zieten igande gauean.
Eusko Label Ligako eta Euskotren Ligako jardunaldiak Galiziako uretan jokatu zituzten, baina mutilek bakarrik lortu zuen gainerako traineruei aurre egitea; izan ere, gutxigatik bada ere, neskek bandera galdu egin zuten. KAE2 ligako Orio B taldeak, berriz, Bizkaian jokatu zuen estropada, eta horiek ere irabazi egin zuten.
Lortutako balentriak tarteko, igandean, herritarrek harrera paregabea egin zieten Orioko gizonezkoen bi ontzietako kideei. Ohiko ordutegitik kanpo egin zuten, ordea, harrera; bi ordu beranduago, 22:00 aldera, arraunlariek Galiziatik itzultzeko denbora behar izan baitzuten. Harrera desberdina izan arren, ilunpean bada ere, gau giro ederra sortu zen.
