Irudiak horrenbesteko garrantzia duen garaiotan, haren jatorriari eta nondik norakoei buruz gehiago jakiteko aukera izan zuten Gukakideek, atzo, igandea, egindako bisita gidatuan. Izan ere, Gukaren bazkideek Zarauzko Photomuseum Argazki eta Zinema Museoa ezagutu zuten, guztiz doan. 1993ko irailean ateak zabaldu zituenetik, Photomuseumek argazkigintzaren historia azaltzen du hiru gidalerroei jarraituz: lehena, argazkigintzaren garapen teknikoa; bigarrena, irudi fotografikoek komunikatzeko tresnatzat duten balioa; eta hirugarrena, argazkigintza arte alorrean. Gainera, 2006 urtean erakusketa iraunkorra jarri zuen abian, zinemagintzaren hastapena jorratzen duten material interesgarriekin.
Atzokoa, Gukakideekin egin den hirugarren bisita gidatua da, eta udaberrirako laugarrena prestatzen ari da Guka. Gukakideen esperientziak guztiz doakoak dira bazkideentzat.