Euskal Itsas Museoak eta Donostiako Aquariumek 1925eko Kontxako Estropadaren ondare kulturala eta historikoa jaso dute elkarlanean, duela ehun urteko estropadetan gertatutako argitalpen batean azalduz eta kirol proba honi lotutako zenbait jarduera antolatuta.
Ciaboga argitalpenaren zenbaki berrian, ehun urte atzera egin eta 1925eko hiriko estropadak aztertu dituzte. Urte hartako Kontxako Banderan bost ontzik hartu zuten parte, hala nola Oriok, Hondarribiak, Donostiak, San Juanek eta Santoñak. Oriotarrak izan ziren, hain zuzen ere, edizio hartako garaileak.
Ikerketaz gain, Arraun Astea ere antolatu dute, eta hainbat jardueraz gozatzeko aukera izango da, tartean 1925eko Kontxako bandera erakusketaz. Bertan, 1925ean Orioko eskifaiak Antonio Maria Uranga patroi zuela irabazitako bandera ikusi ahalko da, eta zabalik izango da hilaren 16ra arte.
Hori ez ezik, K-Toño Frade: Estropaden koloreak erakusketa ere antolatu dute, Juan Antonio Frade Villar marrazkilari eta kartelgileari eskainitako mostra, hain zuzen ere. Euskal Itsas Museoko ganbaran egongo da azaroaren 2ra arte, eta Orioko Arraun Elkartetik eta bilduma partikularretatik jasotako 20 ilustrazio bildu dituzte bertan, besteak beste.
