Hitzordu garrantzitsuak dituzte Orioko arraunlariek asteburu honetan Ondarroako eta Getariako uretan, Eusko Label eta Euskotren ligetako jardunaldiak jokatuko baitituzte. Orioko emakumezkoentzat, gainera, Euskotren Ligaren denboraldiko azken estropada izango da igandeko Getariako jardunaldia.
Bihar, larunbatarekin batera, 17:20ean hasiko da emakumezkoen Euskotren Ligako lehia, eta V. Ondarroako Bandera izango dute jokoan. Eusko Label ligan, berriz, XLI. Ondarroako Banderaren bila arituko dira, 18:20etik aurrera.
Bigarren hitzordu bat ere badute goi mailako arraunlariek asteburu honetan. Hain justu, etzi, igandea, jokatuko dute estropada bana, Getarian.
11:20 aldera uretaratuko dira emakumezko arraunlariak, II. Getariako Ikurrina-Iparragirre 75 urte Sari Nagusiaren bila. Oso berezia izango da azken estropada hau, bertan erabakiko baita emakumezkoen ligako aurtengo txapelduna. Horien artean, Oriok, Arraun Lagunak eta Tolosaldea bezalako aurkari sendoak izango ditu.
Emakumezkoen estropada amaitu ondoren, 12:20 inguruan, Eusko Label liga jokatzen ari diren hamabi traineruek hasiko dute estropada, Getariako XVI. Ikurrina-Ameztoi Sari Nagusia helburu dutelarik. Etxeko taldearekin batera, bertan izango dira Zierbena, Donostiarra eta beste zenbait aurkari indartsu.
