Ez bat, ez bi, ez hiru... Lau bandera. Horiexek etxeratu dituzte asteburuan Orio Arraunketa Elkarteko traineruek. Gizonezkoen ontzi nagusiak asteburuko bi banderak irabazi ditu, larunbatean Getxon (Bizkaia) eta atzo Castron (Espainia), eta emakumezkoenak, atzo Castron. Orio B-k ere bandera irabazi zuen larunbatean Bizkai aldean, asteburuan jokoan zuten bakarra. Emaitzak eta kronikak ikusgai daude atari honek traineru denboraldiari buruz duen atal berezian.
Hala, ohiturari jarraituz, harrera edo alirona izan zen atzo 20:00etan udaletxe aurrean. Orioko Txarangaren doinuei segika kalejira egin, eta igo ziren udaletxera hiru ontzietako arraunlariak eta prestatzaileak, herritarren txaloak jasotzeko banderak astindu bitartean. Eguraldi kaskarrari iskin egin, eta herritar ugari elkartu zen atzokoan ere, asteburu biribilaz gozatzera.
(Argazkiak: Joxeju eta Joxemari Olasagasti)
