Larunbatean eta igandean arraun festa handia izan zen Orion, bertan jokatu baitzituzten larunbatean KAE2 eta ETE ligetako estropadak, eta igandean Eusko Label eta Euskotrenekoak. Hitzordu horiek aprobetxatuta, Orio Arraunketa Elkarteak (OAE) larunbat goizean banatu zizkien kamisetak bazkideei, eta boluntarioek nahiz arduradunek gelditu gabe jardun zuten elastikoak banatu eta banatu: 1.040 partitu zituzten, guztira, goiz bakarrean.
Klubak emandako datuen arabera, 1.540 bazkide inguru ditu une honetan OAEk, eta hortaz, hirutik bik kamiseta berria estreinatuko zuten ospakizunez betetako asteburu honetan.
