Atzokoan sufritzea tokatu zitzaion Orio Arraunketa Elkarteko gizonezkoen traineruari Donostian. Gaur, aldiz, txaponaren beste aldeak egin die distira Zierbenan, Petronor Banderan. Eta nola egin distira, gainera: hamabost segundoko aldearekin irabazi du, 19:56,19eko denbora eginez.
Lehen luzetik aurretik jarri dira, baina ziaboga eman eta poparean hartutako bi olaturi esker hautsi dute estropada. Harrezkero, buruan jarri eta hamar segundotik gorako aldea atera die hirugarren txandako gainerako aurkariei; Zierberna, Urdaibai eta Donostiarrari, hurrenkera horretan. Aldeak apur bat areagotuz, azkenean, erakustaldi ederra emanez irabazi dute mirotzek.
Jardunaldiko sailkapenean, ordea, bigarren txandako ontziak kokatu dira lehen postuetan: Zierberna izan da bigarrena etxean, 15 segundo galduta, baina hirugarren postua Hondarribiarentzat izan da, bigarren txandako onenarentzat; bizkaitarrek baino segundo bat gehiago behar izan dute. Laugarren tokia Urdaibaik lortu du, eta bosgarrena Getariak.
Ligako sailkapen orokorrean, Orio da liderra, 46 punturekin, eta Zierbena dago hurrena, 42 punturekin; hirugarren postuan Urdaibnai dago, 39 punturekin.
Emakumeak, erregulartasunez
Atzo Tolosaldeak ezustekoa eman ondoren, Arraun Lagunakek ez du barkatu gaurkoa Lekeiton, eta burdinola Bandera bereganatu du, 10:45,10eko denborakin. Orio helmugaratu da ondoren, bost segundora, berezko duen erregulartasuna berretsiz. Astillerok eman du jardunaldiko sorpresa, hirugarren postua bereganatuz lehen txandan nagusi izan eta gero; Tolosaldeak laugarren tokia bereganatu du. Saltsa ondorengoen artean etorri da: bosgarren postutik zortzigarrenenako ontziek denbora bertsua egin dute, ehuneko eskas batzuen aldea tarteko.
Lehen luzean, ziaboga ematerakoan, bi segundo eskaseko alde baino ez dio atera Donostiako taldeak Oriori. Itxaropenak bazeuden, baina Arraun Lagunakek atzoko arantza kendu nahi izan du eta indartsu egin du itzulikoa, oriotarrei bost segundo aldea aterata. Ligako sailkapenean ere bi ontziak daude lehen postuetan aipatu hurrenkeran, bi puntuko aldearekin.
Bestalde, Orioko gizonezkoen bigarren taldeak bere dinamika positiboarekin jarraitzen du. Gaur Burdinola Bandera izan da jokoan KAE 2 mailan, eta aise irabazi du beste behin, atzo Laredon bigarren izan ostean; Hibaika izan zen garaile. Harrobia indartsu bezain garaipen gosez datorren seinale.
