Atzo historia egin zuten Orioko arraunlariek: aurrenekoz hiru traineruek batera bandera ekarri zuten etxera eta lehenengo elkartea da historian, egun berean Eusko Label eta Euskotren ligetan bandera irabazten. Larunbatean hiru traineruek beren estropadak irabazi zituzten, eta atzo, Galizian jokoan zen bandera eskuratu zuten maila goreneko bi taldeek.
Bart iluntzean merezitako errezibimendua egin zieten herritarrek arraunlariei. Plaza goraino bete zuten, hiru garaipenak txalotzeko eta ospatzeko. Arraunlariek jendaurrean banan banan banderak astindu ostean, hiru patroiek batera astindu zuten.
