Martxoko azken larunbat honetan gomazko pala-partida bikaina ikusi eta disfrutatu zuten Aiako frontoira bertaratu ziren herritarrek.
Bigarren mailako Udaberri txapelketako finala jokatu zuten Aiako Aranberri eta Zubillagak Elgoibarko Gurrutxaga eta Conderen aurka. Emozio handiko partida izan zen, lehenengo erdian aurretik ibili ziren elgoibartarrak, alde handiarekin, gainera; baina aldea gutxitzen joan zen partidak aurrera egin ahala.
Elgoibarko bikotea 22 eta 17 irabazten joan zen; baina aiarrek ez zuten etsi eta tantoak haien aldera etortzen hasi ziren. Bi aiarrek bat eginda Elgoibarko atzelaria zigortu zuten eta azken tantoak beren aldekoak izan ziren: 25 eta 23 nagusitu ziren finalean.