Uda sasoia amaitzear, Euskotrenek neguko ordutegia ezarriko du datorren astelehenetik aurrera. Aldaketa horren helburua ordutegiak eta maiztasunak batez ere hezkuntza edo lan-arrazoiengatik dauden joan-etorrien beharretara egokitzea dela iragarri du enpresa publikoak.
Aldaketak Euskotrenek kudeatzen dituen tren eta metro zerbitzu guztiei eragingo die, horien artean eskualdetik igarotzen den Donostia-Bilbo tren lineari. Hala, astelehenetik ostiralera, Zumaia eta Donostia arteko zerbitzua 06:00etan hasiko da eta orduerdiro izango dira trenak 22:30ak arte. Horiei, langileen eta ikasleen beharrei erantzun nahian, beste bi tren gehituko zaizkie 07:11n eta 08:11n.
Donostiatik Zumaiarako trenak, bestalde, goizeko 05:50ean hasiko dira, eta hiruburutik itzultzeko azkena 21:50ean izango da.