Astelehenean hasi eta larunbatera arte, hilaren 7tik 12ra egingo dute gizonen aurtengo Itzulia txirrindulari lasterketa, eta hirugarren etapan, asteazkenean, Orio eta Aia inguruan ibiliko da pelotoia. Zarautzen hasi eta Beasainen bukatuko da etapa hori, eta eragina izango du bi herrietako zirkulazioan. Orioko Udalak jakinarazi duenez, 13:00etatik aurrera itxita egongo da Oriotik Zarautzera aldeko N-634 errepide zatia, baita Oriotik Zarauzko kanpinera joateko bidea ere. Antolatzaileek aurreikusi dute 14:30 alderako zabalduko dutela berriz ere errepidea.
Aian, berriz, Zudugaraitik Andazarrate arteko bidea itxita egongo da 13:40etik 14:30 aldera arte, Aiako Udalak baieztatu duenez.
156 kilometroko ibilbidean, zazpi mendate gainditu beharko dituzte txirrindulariek hirugarren etapa horretan. Zarauztik abiatuta, kostako bidea hartuko du lasterketak, Zumaiaraino; handik Zestoa aldera hartuta, Arroatik Iraetara iritsi, eta han Meagako mendatean gora igoko dira, Aizarnazabalen zehar, Meagan behera Zarautzera itzultzeko, eta handik Aiara igotzeko.
Andazarraten behera utziko du eskualdea lasterketak, baina Tolosatik bueltan berriro itzuliko da Urola Kosta aldera pelotoia, etapako bi mendate nagusiak igotzeko, hain zuzen: Santa Ageda lehendabizi, Beizamara jaitsi aurretik; eta Beizamatik jaitsi eta Nuarbetik Matxinbentaraino joanda, Mandubia.