Baxurako arrainekin errezetak izeneko sukaldaritza tailerra egingo dute asteazken honetan 19:00etan hasita Aldapa elkartean. Parrilla Festaren atarian antolatu dute tailerra, Arrantza eta gastronomia jarduera sortaren barruan. Saioa doakoa da, baina tokia mugatua denez, ezinbestekoa da Turismo Bulegoan izena ematea. Epea zabalik egongo da tokia bete arte.
Sukaldaritza tailerrean baxurako arraina izango da protagonista, eta hura prestatzeko hainbat errezeta landuko dituzte parte hartzaileek. Tailerraren bidez, bertako arraina sukaldaritzan erabiltzeko aukerak ezagutarazi eta herriko itsas ondarearen eta gastronomiaren arteko lotura nabarmendu nahi du udalak. Izan ere, Parrilla Festaren helburuetako bat da Orioko ondare gastronomikoa ezagutaraztea eta belaunaldiz belaunaldi transmititzea.
Tailer honen aurretik, joan den astean Kofradiaren eraikinak 100 urte izeneko hitzaldia eskaini zuten Jon Agirresarobek eta Pedro Migel Urangak, hura ere Arrantza eta gastronomia jarduera sortaren barruan.