Orio Arraunketa Elkarteak 125 urte banderaren bila! izeneko liburuxka aurkeztu du, 1901ean lehen Kontxako Bandera irabazi izanaren 125. urteurrena gogora ekartzeko. Arraunetxeko egoitzan daude bandera gehienak ondo gordeta eta batzuk ikusgai ere bai, beste hainbat garaikur, kartel eta argazkirekin batera. Bada, liburuxkaren harira, bisita gidatuak egiten aritu dira egunotan Arraunetxeko erakusketa gela horretan.
Aurrenekoa pasa den astean egin zuten, hain zuzen ere, eta hogeiren bat lagun elkartu ziren hitzordu hartan, Joxemari Olasagastiren azalpenak entzutera; bera da lanaren egileetako bat, baita OAEren historia goitik behera ezagutzen dutenetako bat ere.
Hala, erakusketa bisitatzeko interesa dutenek, oraindik horretarako aukera dute; izan ere, bihar arte izango da ikusgai erakusketa. 18:00etan euskaraz emango dituzte azalpenak, eta 19:00etan, berriz, gaztelaniaz. Bisita horietan liburuxka erosteko aukera ere izango dute herritarrek, 10 euroan.