Orioko Karela kiroldegiak kudeaketa berriarekin hasi du gaur 2025-2026 ikasturtea, izan ere, hemendik aurrera Neo enpresak kudeatuko du kiroldegia BPXporten ordez, eta asteazkenean azalduko ditu Orioko Udalak xehetasunak ikastaroez, ordutegiez eta prezioez. Gainera, Haize-Berri taberna zegoen gunean sortutako gimnasioa ere dagoeneko martxan da, eta hasiera batean, herriko kirol klubei zuzenduta egongo da bertako zerbitzua.
Gaur, astelehena, ordutegi berriarekin zabaldu ditu ateak kiroldegiak: astelehenetik ostiralera 07:00etatik 21:00etara egongo da irekita, larunbatetan 09:00etatik 13:00etara eta 16:00etatik 20:00etara, eta igande eta jaiegunetan, berriz, 09:00etatik 13:00etara. Ikastaroetan izena emateko epea, berriz, ostiralean irekiko da, irailaren 5ean.
