Saregile Emakumeen Etxeak pasa den ostiralean jasandako erasoak salatzeko asmoarekin, elkarretaratzea deitu du Orioko Mugimendu Feministak ostiral honetarako. Herriko Plazan izango da hitzordua, 20:00etan hasita.
Mugimenduko kideek sare sozialetan azaldu dutenez, sarrerako kristala hautsi zuten "pisua jaurtiz", baita fatxada zikindu ere, ostiraletik larunbaterako gauean. Eraso hau, ordea, ez dela "isolatua" izan gaineratu dute, eta bi urte inguru daramatzatela, beste kolektibo batzuekin batera, erasotuak izaten. Hala, dei egin die herritar guztiei elkarretaratzera gerturatzeko, baita erasoen aurka daudenen sinadurak jasotzeko galdetegia betetzeko ere.
