Ibon Gaztañazpik Orioko Udalaren enkarguz zuzendutako Errio dokumentala kiroldegian estreinatuko dute bihar, herritarren aurrean. Proiekzioa Herriko Plazan egitekoa zen, baina, eguraldiaren iragarpena ikusita eta saioaren iraupena kontuan hartuta, tokia aldatzea erabaki du udalak, "erosoago izateko".
Orioko itsas ondareari balioa emateko ikus-entzunezkoa 22:00etan hasiko da, eta amaitutakoan, lantaldeko kideekin hitz egiteko eta galderak egiteko aukera edukiko dute herritarrek. Kiroldegian izango dira Gaztañazpi bera, Nagore Urdapilleta dokumentaleko aurkezlea eta Beñat Gereka errealizadorea.
Dokumentalak ordubeteko iraupena du, eta saioak, guztira, bi ordu inguru iraungo duela jakinarazi du udalak.
Gonbidapenak eskuragarri
Sarrera librea da, eta gonbitak turismo bulegoan har daitezke. Gainera, herriko eragileak ere gonbidatu ditu udalak aurkezpenera, eta izen-emate galdetegia prestatu du asistentzia konfirmatzeko.
Udalak jakinarazi du orain arte 400 lagunetik gorak eman duela izena, eta gainerako herritarrei ere bertaratzeko dei egin die, "saio ederra" izango delako.
