Pasa den igandean jokatu zuten ETBko Harri Herri saioko neguko edizioaren finala, Aiako Probalekuan. Guztira, 38 harri jasotzaile –21 gizonezko eta hamazazpi emakumezko– lehiatu dira neguko edizioan, hiru jardunalditan banatuta, eta hamasei izan dira azken txanpara sailkatu direnak; zortzi gizonezkok eta zortzi emakumezkok, alegia.
Hala, emakumezkoen kategorian Maddi Gesalaga nagusitu da. Zarauztarrak 16 jasoaldi egin ditu 73 kiloko harri baldarrarekin, hiru minutuko txanda bakarrean. Gizonezkoetan, aldiz, 132 kiloko landu gabeko harria hamahiru aldiz bizkarreratu du Mikel Lopetegi Urrak. Bi harri jasotzaile zarauztarrek "gustura" eman diote hasiera urteari, txapelak jantzita.