Pentatloiko Gipuzkoako Txapelketa jokatuko dute igande honetan Irunen (Gipuzkoa) lau gizonezkok, tartean Andoni Iruretagoiena Izeta VI.a aiarrak eta Xabat Olaizola zarauztarrak. Beste bi lehiakideak Jokin Urretabizkaia eta Iñigo Zabala izango dira. Izeta VI.a, Olaizola eta Urretabizkaia Euskal Pentatloi Txapelketako finalerako sailkatuta ere badaude. Irailaren 26an izango da lehia hori, Azpeitiko zezen plazan.
Igande honetako hitzordua, berriz, 11:30ean hasiko da, Urdanibia plazan, eta txapelketa hori ez ezik, trontzako Gipuzkoako Txapelketa ere jokatuko dute zortzi emakumek. Honako lau bikoteek parte hartuko dute: Jone Uriak eta Ane Urrestik; Aitziber Martiarenak eta Malen Barrenetxeak; Naiara Peñagarikanok eta Naia Zubillagak; eta Maitane Lasartek eta Ainhoa Otañok.