Eskubaloiko jubenil mailako Europako Txapelketa jokatuko du gaur hasita Markel Errasti aiarrak Serbian, Espainiako selekzioarekin. Ezker hegalekoak denboraldi bikaina burutu du, eta Bidasoa Irun taldeak fitxatu du datozen hiru denboraldietarako.
Errastiren taldeak gaur emango dio hasiera txapelketari, 19:30ean, Austriako selekzioaren aurka. Multzoen faseko beste bi partidak bihar eta larunbatean jokatuko dituzte. Biharko partidan Faroe Uharteak izango dituzte parean, 19:30ean. Larunbatean, berriz, Finlandiako selekzioaren aurka neurtuko dituzte indarrak, 14:30ean. Bigarren ligaxkari abuztuaren 3an emango diote hasiera, eta txapelketaren finala abuztuaren 9an izango da. Partida oro Europako Eskubaloi Federazioaren webgunetik jarraituko ahalko da.