Santio Errekako festen amaiera iristear da, baina aurretik aparteko herri kirol erakustaldiaz gozatzeko aukera izango da. Hain zuzen ere, bihar, ostirala, Ortzaika eta Santio Errekako auzotarrek herri kirol desafioa jokatuko dute. Sei pertsonaz osatutako taldeak lehiatuko dira auzoko frontoian, eta askotariko probak egin beharko dituzte: harri jasotzen ariko dira aurrena, txingekin eta ingudearekin gero, korrika ondoren, eta trontzan, azkena. Iazko jaietan Ortzaikakoek jantzi zuten txapela, eta aurten ere garaipenaren atzetik ariko dira.
Gaur ere izango da zer ospaturik auzoan. Sagardo dastaketa egingo dute arratsaldean, eta ondoren dantza egiteko txanda izango da, Abiba Diskojaiak jarriko baitu festa giroa Santio Errekan.
Bihar amaituko dituzte festak eta hona hemen egitaraua:
Gaur, osteguna
- 19:00. Sagardo dastaketa.
- 00:00. Abiba Diskojaia.
Bihar, ostirala: San Inazio eguna
- 11:30. Ortzaika eta Santio Erreka auzoen arteko herri kirol desafioa.
- 14:30. Oilasko biltzeko auzo bazkaria frontoian, Larrume, Iñaki Gurrutxaga eta Beñat Gaztelumendi bertsolariekin. Bazkarirako txartelak salgai txosnan eta Portu erretegian.
- 20:00. Bide Batez erromeria.