Festa giro betean dira Santio Erreka auzoan. Pasa den larunbatean hasi ziren auzoko festak ospatzen, eta asteburu honetan ere badago zerekin gozatua. Hain justu ere, gaur, Santio Egunez, herri kirol jaialdia egon da auzoan. Batetik, Gipuzkoako Aizkolari Gazteen txapelketa jokatu dute eta, bestetik, 4 Arroa txapelketako kanporaketa.
Aizkolari Gazteen txapelketari dagokionez, hiru aizkolari izan dira lehian: Eneko Esnaola, Jakes Iruretagoyena Izeta V. eta Jon Zaldua. Txapela Zalduarentzat izan da, 10 minutu, 17 segundo eta 44 ehuneneko denboran burutu baititu lanak. Bigarren sailkatua, berriz, Esnaola izan da, 10 minutu, 48 segundo eta 32 ehuneneko denborarekin. Izeta V. izan da hirugarren, 11 minutu, 12 segundo eta 81 ehuneneko denborarekin.
4 Arroa txapelketako kanporaketan, berriz, bost harri jasotzaile izan dira nor baino nor gehiago: Ane Cestau, Maddi Gesalaga, Irati Osinalde, Maddi Salterain eta Alba Zubiria. Bost harri jasotzaile horietatik lau sailkatu dira abuztuaren 10ean egingo den hurrengo 4 Arroako txapelketarako: Maddi Gesalagak, Ane Cestauk, Alba Zubiriak eta Maddi Salterain. Honakoak izan dira gaurko kanporaketako emaitzak:
Jaiak aurrera doaz, baina oraindik ere auzotarrei geratzen zaizkie indarrak festan jarraitzeko. Honakoa da egitaraua:
Gaur, larunbata: Santio Eguna
- 19:00. Ondoezik Elektrotxaranga, geltokitik hasita.
- 23:00. Kontzertuak: Txiskeroak eta EH Sukarra.
Bihar, igandea: Santa Ana Eguna
- 16:00. Umeentzako jolasak eta puzgarriak, frontoian.
- 19:00. Erromeria, Ostolaza eta Larrañagaren eskutik.
Uztailak 30, osteguna
- 19:00. Sagardo dastaketa.
- 00:00. Abiba Diskojaia.
Uztailak 31, ostirala: San Inazio Eguna
- 11:30. San Martin eta Santio Erreka azuoen arteko herri kirol desafioa.
- 14:30. Oilasko biltzeko auzo bazkaria frontoian, Larrume, Iñaki Gurrutxaga eta Beñat Gaztelumendi bertsolariekin. Bazkarirako txartelak salgai txosnan eta Portu erretegian.
- 20:00. Bide Batez erromeria.
(Argazkiak: Ibon Errazu eta utzitakoak).