Gipuzkoako Herriarteko Pilota Txapelketa badoa aurrera, eta eskuzko lehian kanporatuak izan ondoren, Aiak gomazko paletan jarraitzen du bizirik.
Aiako palistek atzo ekin zioten lehiaketari, zuzenean sartu baitira final laurdenetara. Partidak Soraluzen jokatu zituzten herri horren aurka, eta hiru norgehiagokak irabazita, esan liteke final erdietara sartzea ahalbidetuko dien kanporaketa bideratu samar utzi dutela.
Buruz buru kantxa osoan jokatutako partidan, 8-20 gailendu zen Aldalur; binakako partida 19-20 irabazi zuten Aranberrik eta Lertxundik; eta banaka zazpi koadroren barruan jokatutakoan sei tantoko aldea atera zion Lizasok aurkariari, 14-20 eginda. Final laurdenetako itzulerako partidak etxean jokatuko dituzte datorren asteburuan.