Aiarrak oso fin dabiltza eskuzko Gipuzkoako Herriarteko Pilota Txapelketan. Final hamaseirenetan Zizurkil kanporatu ondoren, joan den asteburuan Oiartzun izan dute aurkari final zortzirenetan. Kontrario gogorra da, azken urteetako txapelduna baita, baina aiarrek erakutsi dute indartsu daudela, joanekoan 2-1 nagusitu baitira.
Ostiral arratsaldean Aian bertan jokatu zituzten hiru partidak. Kadeteen lehia estu joan zen, baina Atorrasagastik eta Illarramendik osatutako bikoteak 22-17 irabazi zieten oiartzuarrei. Jubeniletan, bestelakoa izan zen kontua: Aizpuruk eta Iruretagoienak ezin izan zuten tantorik egin, eta 0-22 galdu zuten partida. Nagusietan, ordea, aiarrak izan ziren garaile; kolorerik ez zen egon, eta 22-8 irabazi zuten norgehiagoka Albenizek eta Orbegozok.
Ostiral honetan 19:00etan hasita erabakiko da kanporaketa, Oiartzunen, Madalensoro pilotalekuan.