Gipuzkoako Fiskaltzak 11 urteko espetxe zigorra eskatu du Aiako adingabeen zentroko hezitzaile batentzat, "egoiliar bati abusuak egin izana" egotzita, eta horrez gain, baita hari zentro horretatik ihes egiten lagundu izanagatik ere. Biktima Gipuzkoako Foru Aldundiaren tutoretzapean egon da hamarkada batez baino gehiagoz. Hil honetan epaituko dute akusatua Gipuzkoako Lurralde Auzitegiko Lehen Sekzioan.
Gertakariak 2019ko urritik 2022ko otsailera bitartean izan ziren, adingabea Iturriotz Azpi zentroan zegoela, aldundiaren zaintzapean.
Gipuzkoako Foru Aldundiaren Zainketa eta Gizarte Politiken sailak Gukari adierazi dionez, "gertakarien berri jakin eta berehala" jakinarazi zizkion Fiskaltzari, eta salatu egin zituen. "Urte hauetan guztietan aldundiak adingabeari lagundu dio prozesuan zehar, eta kolaborazio zuzena izan du bere defentsarekin. Orain adinez nagusia denez, aldundiak ezingo du prozesuan defendatu, nahiz eta aurreratu bezala, harreman zuzena duen biktimaren abokatuarekin".