Aiako Udalak, "herritarren segurtasuna bermatzeko" asmoarekin, zazpi desfibriladore ezarri ditu herrian zehar. Helburua herritarrei bihotz-geldialdi kasuetan erantzun azkarra emateko aukera eskaintzea da.
Hori horrela, herriko zazpi puntutan instalatu dituzte desfibriladoreak: anbulategian, farmazian, Etxeta bailara eta Iruretaegiako buzoietan, Andatza auzoko eskola etxean, Santio Erreka auzoko frontoi atzean, Elkano auzoko elkartearen ondoan eta Urdaneta auzoko eskola etxean.
Desfibriladoreak une oro erabilgarri egongo direla ere jakinarazi du udalak, "larrialdi egoeretan esku hartzeko", eta dei egiten die herritarrei gailu horiek "zaindu eta egoera onean mantentzeko". Hori ez ezik, desfibriladoreen erabilerarako formakuntza saioak ere eskainiko dituzte hurrengo asteetan: "Herritarrak tresna horiek behar bezala erabiltzeko gaitasuna eskuratuz, komunitate osoaren segurtasuna hobetzen lagunduko du".