Aia

Ohiko bizileku ez diren etxebizitza hutsei %50eko errekargua aplikatuko die Aiako Udalak

Onintza Lete Arrieta 2025ko mar. 4a, 08:00

Aiako plaza.

Ondasun Higiezinen gaineko Zergan (OHZ) etxebizitza hutsei errekargua ezartzea onartu du Aiako Udalak. Hainbat salbuespen egongo dira, eta interesdunek martxoaren 31ra arte egin ahalko dituzte beren eskariak.

Aiako Udalak Ondasun Higiezinen gaineko Zergan (OHZ) etxebiziza hutsei aplikatu beharreko errekargua onartu du. Errekargua %50ekoa izango da, baina salbuetsita geldituko dira hainbat baldintza betetzen dituztenak: jarduerei lotutako etxebizitzak baldin badira (EJZn alta emanda egon beharko dute); alokatutako etxebizitzak baldin badira (aurreko urtean gutxienez bederatzi hilabetez); adineko egoitzetan erroldatuta dauden pertsonen titulartasuna duten etxebizitzak baldin badira; herentzia baten parte diren etxebizitzak, titularra hil eta bi urteko epean; lurzoru urbanizaezinean dauden etxebizitzak baldin badira, urbanizazio baten parte direnak izan ezik (Arginmuno); eta etxebizitza hutsak, baldin eta 300 kWh gutxieneko energia-kontsumoa frogatzen badute.

Interesdunek martxoaren 31 baino lehen aurkeztu beharko dituzte beren eskariak udaletxean bertan, dagozkien froga agiriekin. Informazio gehiago nahi duenak udaletxean eska dezake, baita aia.eus udal webgunean ere.

Orio Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide