Gogotsu hasi dituzte inauteriak aiarrek. 15:00etan puntuan, goraino betetako Dema plazan jaialdi koloretsua eskaini dute Lardizabal Herri Eskolako ikasleek, mailaz maila koreografia politak eskainiz. Musikaren bilakaera izan da aurtengo gaia, eta askotariko doinu eta jantziez gozatu dute herritarrek.
Emanaldiaren amaieran, guraso elkarteko kideek parte hartu dute, haiek ere koreografia alaia eskainiz ikasleei.
Umorea nagusi, arratsalde-iluntzean jarraituko du festak. Eskolako jaialdia amaitzeko txokolate beroa eskaini dute frontoian, eta 19:00etan, kuadrillen topaketa egingo dute plazan. Ondoren, ikuskizun bat eskainiko dute, eta horren ondotik, festa borobiltzeko, pintxo pote girotua izango da herrian, DJ Track-a-ren eskutik. Horrekin amaituko dituzte inauteriak Aian.