Aian izan dira Olentzero eta Mari Domingiren bisita jasotzen goiztiarrenak. Izan ere, gaur arratsaldean iritsi dira asto gainean, eta harrera beroa egin diete haurrek nahiz helduek.
Etxetxon elkartu dira ongi etorria egiteko, eta beren omenezko kantak abestu dizkiete lehendabizi han bildutakoek. Gero, probalekuraino kalejira egin dute, trikitilariak lagun. Probalekuan haurrek beren gutunak helarazteko aukera izan dute; txikienek aurrena, helduagoek gero. Gaztaina erreak jateko aukera ere izan dute gerturatutakoek.