Harri-jasotze errekor saiakerak egingo dituzte sei harri-jasotzailek Aian. Hitzordua larunbatean jarri dute, probalekuan, 18:00etan. Bertan arituko dira: Xiker Larrea Goikoetxe (Beasain) 200 kiloko errektangular modernoa jasotzen saiatuko da marka pertsonal gisa; Xabier Aranburu Guzta (Idiazabal), 237 kiloko errektangular modernoarekin arituko da; Gari Garmendiak Garmendia II (Idiazabal) 215 kiloko harri errektangular zaharra erabiliko du. Antolatzaileek iragarri dutenez, azken harri hau "konplikatua" da, "helduera eta teknika ezberdinak" erabili behar baitira. Aroa Sanchezek (Orio) hartuko du parte 135 kiloko harriarekin. Proba egitea lortzen badu, kilo gehien altxa dituen bigarren emakumezkoa bilakatuko litzateke. Udane Ostolazak (Orio), orain arte emakumezkoetan egin ez den errekorra hautsi nahi du. Hain zuzen ere, bere pisu bikoitza jasotzen saiatuko da Aian. Estefania Etxebestek Estefi, berriz, 100 kiloko zilindro zaharrarekin ahalik eta jasoaldi gehien egiten saiatuko da.
3 minutuko txandak egingo ditu harri-jasotzaile bakoitzak.Txapelketako gastuak ordaindu ahal izateko sarrerako 10 euro ordaindu beharko du ikuskizunaz gozatu nahi duenak.