Aiako pilotalekuan atzo jokatu ziren Pala Txapelketa Mistoko finalak, hirugarren urtez jarraian. 18:00etan ekin zioten lehenengo partidari. 14 urte bitartekoen partida jokatu zen lehendabizi: Eki Aizpuruk eta Maddi Cotanok aurkari izan zituzten Xuban Illarramendi eta Saioa Larrañaga. Azken hauek jantzi zuten txapela, jokatutako bi partidak irabazita: 10-6 eta 10-5 markagailuarekin bukatu ziren bi partidak.
Helduen kategorian, indarrak neurtu zituzten Lorentz Orbegozok eta Olaia Orbegozok, Jon Aranberriren eta Garazi Eizmendiren aurka. Anai-arrebak izan ziren garaile, azkenean hiru partidetatik bi irabazita. Lehena galdu egin zuten, 4-10 markagailuarekin, beste bietan, ordea, hasiera txarrari buelta ematea lortu zuten, garaipena lortuta: 10-8 egin zuten bigarren partidan, eta 5-2 hirugarrenean.