Aiako Mendi Lasterketaren 10. edizioa izango da aurtengoa, eta eman dute data zehatzaren berri jada: urriaren 3a, igandea. Urriaren 1a izango da izena emateko azkeneko eguna, baina plazak lehenago amaitzen badira, une horretan bertan itxiko dute izen-ematea. Gehienez 400 pertsonak parte hartu ahal izango dute lasterketan, eta momentuz, 28 pertsonak eman dute izena. Lotura honetan egin daiteke izen-ematea, 18 euroan.
Aurten ere hiruna sari banatuko dituzte emakumezkoen eta gizonezkoen kategorietan, 200 eurokoak, 150 eurokoak eta 100 eurokoak. Dena den, inork kategoriako marka hausten badu, 100 euroko saria jasoko du. 1:04:35ekoa da gizonezkoen marka Aiako Mendi Lasterketan, eta 1:14:23koa emakumezkoena. Goian zehaztutako estekan daude lasterketaren inguruko zehaztapen guztiak.
Iaz martxo hasieran izan zen Aiako Mendi Lasterketa; bederatzigarren edizioa, hain zuzen. Oier Ariznabarretak (1:05:19) irabazi zuen gizonezkoetan, eta Janire Fernandez de Olanok (1:29:59) emakumezkoetan. Mikel Usandizaga (1:17:44) izan zen helmugaratzen lehena aiarren artean, eta oriotarren artean azkarrenak, aldiz, Ibai Makazaga (1:08:31) eta Amagoia Iribar (1:47:46) izan ziren.