Astelehenean, Ertzaintzak 31 urteko gizona atxilotu zuen Aian droga trafikoa egotzita, eta izapidea ireki zien beste hiru lagunei, ikertu gisa, osasun publikoaren aurkako delitua egotzita. Izan ere, Ertzaintzak jakinarazi du Aiako pabiloian 15 kilo marihuana, kilo bat haxix, 2.500 euro, hiru doitasun-balantza, eta droga ontziratzeko eta banatzeko materiala aurkitu zuela.
Antza denez, abenduan abiatu zuen ikerketa Urola Kostako Ertzain-Etxeak. Agenteak ohartu ziren egunero jende mordoa joaten zela Aiako pabiloira, eta nagusiki marihuana erosten zutela bertan. Ertzaintzak pabiloia miatzeko baimena eskatu zuen Azpeitiko Epaitegian, eta astelehenean egin zuten miaketa. Hiru lagun topatu zituzten agenteek gunean, eta horietako batek ertzainei azaldu zien pabiloian kokatzen den kalamu elkarteko arduraduna zela. Ertzaitzak azken hau atxilotu zuen, eta pabiloian zeuden beste hiru lagunak ikertzen ari da.
