Francisco Franco diktadorea hil zela 50 urte beteko dira datorren azaroaren 20an, eta urtemuga hori dela eta, frankismoaren bueltako lanketa berezia egingo du Gukak. Bihartik azaroaren 23ra bitartean, diktaduraren bueltako hainbat gai landuko ditu hedabideak.
Egunkarian hamabi erreportaje kaleratuko ditu Gukak datozen egunetan, besteak beste, garai hartako gizarteaz, frankismoaren krimenez eta ordutik oraino memoriaren arloan egindako bideaz. Gainera, egunkariaren azalak ere bereziki landuko ditu hedabideak, erreportajeei lotutako irudiek hartuko baitituzte lerroburu nagusiak egunero.
Bestalde, bi ikus-entzunezko ere argitaratuko ditu hedabideak, Guka Telebistan nahiz webguneetan. Horietako batean, eskualdeko heldu hainbatek Franco hil zen egunean bizitakoak eta sentitutakoak kontatuko dituzte; bestean, berriz, gazteak izango dira protagonista, eta transmisioa izango dute ardatz horiek.
Gainera, mahai ingurua egingo du Gukak, Franco hil eta 50 urtera frankismoaren itzala zer-nolakoa den aztertzeko. Mahaiaren bueltan elkartuko dira Eneko Etxeberria Aranzadiko presidentea, Amagoia Gurrutxaga kazetaria eta Unai Belaustegi EHUko historia garaikidean doktorea. Maddi Txintxurreta Gukako kazetariak gidatuko du saioa.