Ordu gutxi batzuk baino ez dira falta Errege Magoak gure herrietara iristeko, eta horrekin, Gabonak ere bere hondarrera ailegatzen ari dira. Izan ere, bihar 18:00etan Orion izango dira Meltxor, Gaspar eta Baltasar beren laguntzaileekin, eta danborrada ere izango da, ohi bezala. Egunotan ari dira jo eta su entseatzen herriko neska-mutikoak. Zubitik kiroldegira egingo dute desfilea, udaletxean geldialdia eginda. Ibilbide zehatza hauxe izango da: Aita Lertxundi, Ibai Ondo, Herriko Plaza, Eusko Gudari, Arrantzale eta kiroldegia.
Aiara, berriz, 19:00etan iritsiko dira hiru Errege Magoak. Plazan da hitzordua.
Aurrez, eguerdi partean, Erregeen Karterua ibiliko da ilusioz betetako gutunak jasotzen. Aian, probalekuan da hitzordua, 12:00etan. Aurrena Ekain pailazoak ikuskizuna eskainiko du, eta ondoren jasoko ditu gutunak postari magikoenak.
Orion, berriz, kalerik kale ibiliko da karterua, 11:00etan hasita.
