Santa Zezilia, musikarien eguna, azaroaren 22an ospatuko da, eta Danbolin musika eta dantza eskolakoek, urteroko legez, emanaldiak eskaini dituzte ospakizunaren harira. Egunari hasiera emateko, eguneko zentrora joan dira zenbait ikasle eta irakasle gaur goizean, ekitaldi txiki bat eskaintzera, eta egoiliarrak abestera animatu dituzte.
Arratsaldean, berriz, trikitixa eta pandero taldea, soka taldea, bandak eta musikako eta dantzako ikasleak izan dira protagonistak. Gazteenetatik hasi eta helduenetara iritsi arte, plaza jai handi bat bihurtu da, musikaz eta dantzaz betea. Herritar ugari gerturatu da emanaldiak aurrez aurre ikustera, eta giro polita sortu da Santa Zezilia egunaren bueltan.
(Argazkiak: Julene Sorarrain eta Onintza Lete Arrieta).