Europako Gizarte Zerbitzuen sarien –European Social Services Awards, ESSA– finalisten artean da Orioko Udala, Komunitatea indartzea eta gizarteratzea kategorian. Sari horiek gizarte zerbitzuen arloko berrikuntza eta bikaintasuna aitortzen dituzte, eta aurtengo sari banaketa azaroaren 19an eta 20an egingo dute, Erroman, Celebrating Innovation and Excellence in Social Services lelopean.
Udalak ohar bidez azaldu du Europako hainbat herritan eta hiritan garatutako egitasmoen artean hautatua izateak "nazioarteko aitortza" ekarri diola Orion azken urteetan egindako lanari. Udalaren esanetan, epaimahaiak bereziki baloratu du Orioko Udalak "justizia soziala udal jardun osoan zeharlerrotasunez txertatzeko egindako ibilbidea". Hau da, justizia soziala ez lantzea gizarte zerbitzuen esparrura mugatuta; udal politika eta jarduera guztien ikuspegian txertatzea, eta norabide horretan hainbat arlotan proiektu eta egitasmo zehatzak garatzea. "Ikuspegi partekatu hori udaleko sail eta esparru desberdinen arteko elkarlanean gauzatu da", gaineratu du udalak.
Ildo beretik mintzatu da Anuska Esnal Orioko alkatea: "Gure helburua justizia soziala udalaren erabaki eta politika guztietan presente egotea da. Zaintzan, energian, kirolean nahiz aisialdian, herritar guztiek aukera berdinak izatea nahi dugu. Horretan ari gara lanean, eta aitortza honek bide horretan jarraitzeko indarra ematen digu". Udalaren ustez, "Oriok Gizarte Zerbitzuetan egindako eraldaketak ondokoa islatzen du: programa bereizietatik sistema integratu batera pasatzea; erreakzioan oinarritutako laguntzetatik prebentziora igarotzea; trantsizio energetiko teknikotik trantsizio justura pasatzea; zaurgarritasun egoeran zeuden haurrak espazio komunetatik kanpo egotetik ohiko espazioetan parte hartzera eramatea; eta udal baliabide isolatuetatik komunitate aktibo batera jauzi egitea".
Zaintza, energia, kirola eta gehiago
Udalaren ustez, ibilbide horren erakusgarri dira azken urteotan Orioko Udalak garatutako hainbat egitasmo eta eraldaketa. Horietako batzuk zerrendatu ditu oharrean: gizarte zerbitzuen alorrean, egitura profesionala indartu izana, pertsonen beharren balorazioa, laguntza eta jarraipena hobetuz; esku hartze soziohezitzailea eta psikosoziala, koordinazioa eta prebentzio komunitarioa sendotuz; zaintzaren inguruko herri eraldaketa bultzatu izana, herritarren artean zaintzaren balioari eta erantzukizun partekatuari buruzko lanketa eginez; eta udalaren arreta eta zaintza eredua eraldatzen joan izana, pertsonen beharrei modu integralagoan erantzuteko, haien autonomia sustatzeko eta komunitateko babes sareak indartzeko.
Udalak bestelako zenbait programa eta egitasmo ere nabarmendu ditu. Batetik, Orioko Energia Komunitatea aipatu du, trantsizio energetikoa "gizarte justiziarekin lotzen duelako". Izan ere, energia berriztagarrien onurak herritarren artean partekatzeaz gain, baliabide ekonomiko gutxien dituzten familiei lehentasuna ematen die, "aukera berdintasuna eta gizarte kohesioa sustatzeko".
Kirolaren arloan, berriz, Abailan orientazio zerbitzua aipatu du, "herri eraldaketa inklusiboa" sustatzen delako. "Egitasmoak herritar guztiek jarduera fisikoa eta kirola egiteko aukera izan dezaten bultzatzen du, bakoitzaren beharretara eta egoerara egokitutako orientazioa eskainiz".
Txalupan programa ere nabarmendu du, "zailtasun linguistiko, sozial edo ekonomikoak dituzten haurrei herriko kirol, kultura eta aisialdi jardueretan parte hartzeko aukera eskaintzen zaielako, haur guztiek herriko bizitzan aukera berdinak izan ditzaten".