Orioko Udalaren udazkeneko programaren barruan, Hiru ko lore kontzertua eskainiko dute igandean, San Martin baselizan. Emanaldia 18:00etan hasiko da, eta Alba Carretero oriotarrak eta Pablo Lizardi eta Iker Idoate errioxarrek osatutako hirukoteak musika ekarriko du elizara.
Kontzertuaren izenburuari dagokionez, "hitz joko bat" dela azaldu du Carreterok. "Hiru instrumentu, hiru tinbrika ezberdin edo hiru kolore uztartzetik sortzen den hiruko lore bat, alegia". Hain zuzen ere, perkusioaren, gitarraren eta biolinaren soinuak batuko dituzte emanaldian, "hiru petalo izango balira bezala".
Gainera, "denetariko musika" jotzeko asmoa dutela azaldu du oriotarrak. "Spoilerrik egin gabe, eta munduari bira emanez, garai eta estilo ezberdinetako kantuak eta piezak interpretatuko ditugu. Batzuk gure instrumentuetarako bereziki idatzitakoak izango dira; besteak, berriz, guk geuk egindako moldaketak".
Aurreko urteetan antolatutako kontzertuen antzera, "zerbait berezia" eskaintzea izan da Carreteroren asmoa, "lagun eta familia artean gozatzeko". Hori horrela, kontzertuak ordubete inguruko iraupena izango du, eta herritar guztiak gonbidatuta daude emanaldira.