Joan den asteburuan N-634 errepideko zubiko barandaren zati handi bat apurtu, eta erriorantz zintzilik gelditu zen. Donostiarako noranzkoan dagoen erreiaren alboko barandaren zati bat da puskatu dena, eta oraingoz, ez dakite zer gertatu den.
Udaltzaingoak Gukari azaldu dionez, Ertzaintzak jakinarazi zien udaltzainei baranda apurtu zela, baina poliziak oraingoz ezin izan du argitu zergatik puskatu den babes hesia. Izan ere, ez dute aurkitu istripuren bat egon denaren zantzurik. Horregatik, ez dute baztertu baranda bere kasa apurtu izana, "egoera txarrean" egotearen ondorioz.
Udal brigadako langileek baranda kendu egin dute hori erriora erortzea ekiditeko, eta hesia jarri dute, eremua babesteko. Izan ere, oinezko ugarik igarotzen du zubia egunero.
