Udan zehar jarduera eta ekitaldi desberdinak antolatu dituzte Orioko hondartzan kokatzen den Mola Mola tabernak. Hala, DJ saioak izan dituzte, kontzertuak, baita azoka ere. Pasa den asteburuan, gainera, jendetza elkartu zuen Zea Maysek tabernan eskainitako kontzertuak. Bide horrekin jarraituz, abuztuaren amaierarako Mola Fest izeneko jaialdia programatu dute tabernako arduradunek.
Jaialdia larunbatean egingo dute, arratsalde partean. 17:00etan emango diote hasiera, Xanti Irazustaren berotzen saioarekin. Ondoren, Rocio Portillo musika elektronikoko DJ eta abeslari argentinarrak kontzertua emango du.
Sarrera doan izango da, baina arduradunek arau bakarra jarri dute: kolore biziko jantziak aukeratzea arratsalde horretan Oriora gerturatzeko. "Etorri armarioan duzun kolore guztiarekin. Sekula janztera animatzen ez zaren hori erabiltzeko aitzakia perfektua emango dizugu", adierazi dute antolatzaileek.