Karmengo Amaren eguna izango da uztailaren 16a, osteguna, eta urtero bezala, aurten ere ospakizuna izango da Orion. Arrantzaleen familiek Karmengo Amaren irudia lorez eta itsasoko motiboez apainduko dute, eta 18:00etan elizkizuna egingo dute parrokian. Meza horretan herriko bapore bakoitzeko kandela bat piztuko dute, nork bere hildako arrantzaleak gogoratzeko, eta traineruentzako ere piztuko dute kandela, hildako arraunlarien alde.
Meza amaitzean,18:30 inguruan, prozesioan joango dira moilara. Han talde batek aurreskua dantzatuko dio Amabirjinaren irudiari, eta ziurrenik Orioko traineruren bat gerturatuko da, apaizaren bedeinkapena jasotzeko. Prozesioaren amaieran, Karmengo Amaren eskapularioak bedeinkatuko dituzte, eta eskuragarri egongo dira nahi duenarentzat.