Orio Arraunketa Elkartea (OAE) esku hutsik itzuli da etxera asteburuan Sevillan jokatutako Espainiako Aulki Mugikorreko Txapelketatik. Hain zuzen ere, klubeko infantilak nahiz beteranoak ostiraletik igandera bitartean izan dira lehian, estatuko 62 arraun elkarteen artean.
Oraingo honetan oriotarrak dominarik gabe itzuli diren arren, azpimarratzekoa da aurkeztutako 10 ontzietatik bi A finalera sailkatu direla, eta beste lau ontzi, berriz, B finalera. Hori ez ezik, nabarmendu beharra dago OAEk aurten sei domina lortu dituela estatu mailako aulki mugikorreko hitzorduetan, hala nola urre bat, hiru zilar eta bi brontze.