61 elkarte eta 441 ontzi lehiatu dira asteburuan Banyolesen (Herrialde Katalanak) jokatu dituzten Aulki Mugikorreko Espainiako Txapelketan. Orio Arraunketa Elkarteak hamalau ontzi uretaratu ditu, eta ez dira esku hutsik itzuliko etxera, zilarrezko bi domina eta brontzezko bat eskuratu baitituzte. Gainera, dominez aparte azpimarratzekoa da lau ontzik lortu dutela A finaletan aritzea, eta beste hiru ontzik B finalak jokatu dituztela.
Kadete, jubenil eta 23 urtez azpiko arraunlarien txapelketa izan da, eta dominak honako arraunlariek jantzi dituzte: zilarrak Uxue Olaskoagak eta Jare Millaresek skull bikoitzean jubeniletan, eta Joel Lizeagak eta Ander Roigek skull bikoitzean kadeteetan. Brontzea, berriz, skull laukoan lortu dute gizonezko jubenilek: Gorka Arrojeriak, Imanol Iruretagoienak, Aimar Ikatzetak eta Axel Atorrasagastik.
KAE 1 liga, Pasaian
Orio B taldeko gazteak bai atzo, bai gaur, azken bigarren helmugaratu dira. 22:48:45 denbora egin dute gaur Pasaian, erlojuaren kontra. Azkenean, ordea, postu bat gorago sailkatu da gaur, epaileek Astillero kaleratu egin dutelako berea ez zen beste kale batetik helmugaratu delako.
Deustuk irabazi du gaur estropada, 20:47:70 denbora eginda –hirugarren izan zen atzo–. Alde nabarmenarekin nagusitu dira bizkaitarrak, Zarautzek 20:59:00 denbora egin baitu. Atzo bezala, gaur ere hirugarren izan da Zumaia, 21:14:27 denbora eginda.