Badok 13 beteranoen ontziak arraun erakustaldi bikaina eman du beste behin ere. Pasa den igandean, Euskadiko Traineru Txapelketa irabazi zuten Getariako uretan, jokoan zegoen ikurrina gogoz astinduz. Estropada "gogorra eta estua" izan zela kontatu dute, baina garaipen honekin, iaz lortutako titulua berritu eta Euskadiko bandera bereganatu du Orioko taldeak.
Igandea ez zen "nolanahiko eguna" izan arraunean egiteko: itsasoa "harrotuta" zegoela kontatu dute, eta "bulkada bakoitzean hortzak estutu" behar izan zituzten arraunlariek. Estropada erabat lotuta joan zen hasieratik, eta amaierara arte "tentsioari eutsi" zioten oriotarrek, azken luzeko erdi aldera arte Badok 13 ezin izan baitzen arerioengandik bereizi.
Une horretan, ordea, martxa bat gehiago sartu, olatua hartu eta estropada hautsi zuten oriotarrek, eta azkarrenak izan ziren helmuga zeharkatzen, 10:45,52 denborarekin. Getxok bigarren postuan amaitu zuen, irabazleengandik 12 segundora (10:58,44), eta Mundakak hirugarren postua lortu zuen, 10:59,56 denborarekin podiumean lekua ziurtatuz.
Euskadiko bandera eskuratuta, Badok 13k beste hitzordu garrantzitsu bat izango du datorren asteburuan: Espainiako Traineru Txapelketan lehiatuko da, Moañan (Pontevedra, Espainia). Han ere "mailarik onena ematea" dute helburu, aurkariak "oso gogorrak" izango direla jakin arren.