Igande honetan izango da urteroko Artisau eta Sortzaile Azoka Herriko Plazan eta Aritzaga kalean, aurten Balearen Eguneko egitarauaren barruan. 10:00etatik 19:00etara egongo da zabalik azoka, eta 30 postu jarriko dituzte dener. Udalak azaldu du eskatzaileen artean zozketa egin behar izan duela, izena ematen dutenen artean.
Postu gehienak, 22, gipuzkoarrak izango dira, eta gainerako launa bizkaitarrenak eta nafarrenak. Jantziak eta osagarriak eta bitxigintza lantzen dituzte gehienek, baina egur-tailla, taloak, ogia eta gozoak, gazta eta eztia, loregintza, eta xaboi eta ukenduak ere izango dira salgai.
Herritarrek hainbat postu
Herriko artisauek ere haien txokoa izango dute Herriko Plazan: jantziak eta osagarriak lantzen dituzten Ostargi elkarteak, Aiora Arrozpidek eta Goiuri Unanuek postu bana jarriko dute azokan; Naiara Larrañagak ilustrazioak, zapiak eta kordelekin egindako giltzatakoak izango ditu salgai; Antxon Mendizabalek egur-taila postua izango du; eta Orioko Herri Ikastolako ikasleak klasean landutako eskulanak ere izango dituzte eskuragai.