Euskal Herrian Euskarazek deituta (EHE), euskaltzale independentisten topaketa egingo dute ostiral honetan, Etxeluze gaztetxean. Arratsaldeko 19:00etan hasiko da hitzordua, eta horretarako, euskararen egoeraren analisia egitea proposatu dute antolatzaileek.
Duela hilabete bat aurkeztu zuen EHEk, Azpeitiko plazan, apirilaren 25ean eta 26an egingo den Euskaltzale Independentisten II. Topaketako egitaraua. Asteburu hori iritsi baino lehen, ordea, egitasmoaren aurkezpen saioak egingo dituzte herriz herri, tartean Orion.
Hala, euskararen analisia amaitu ostean, afari-merienda egingo dute elkarrekin, eta eguna biribiltzeko, kontzertu bana eskainiko dute Antuxuna eta Ü taldeek. 21:30ean hasiko dira emanaldiak, hain justu, eta sarrerak gaztetxean bertan eskuratu ahalko dira 5 euroan.